بلوچستان کے وزیر تعلیم نصیب اللہ مری نے سیکیورٹی وجوہات کی بنا پر کوئٹہ کے تمام سرکاری اور نجی اسکول دو روز کے لیے بند رکھنے کا اعلان کیا ہے۔
انہوں نے کل ایک بیان میں اعلان کیا کہ صوبائی دارالحکومت کے تمام اسکول جمعرات اور جمعہ کو "ناگزیر وجوہات" کی بنا پر بند رہیں گے۔ ادھر بلوچستان یونیورسٹی کو بھی دو روز کے لیے بند کر دیا گیا ہے۔
یہ پیش رفت بلوچستان کے محکمہ داخلہ کی جانب سے انسپکٹر جنرل پولیس (آئی جی پی) بلوچستان، کمشنرز اور ڈپٹی کمشنرز کو صوبے بھر میں سیکیورٹی انتظامات کا جائزہ لینے اور بہتر بنانے کے لیے ہدایات جاری کیے جانے کے چند گھنٹے بعد سامنے آئی ہے۔
"عوامی مقامات، تعلیمی اداروں اور تجارتی مراکز میں فول پروف سیکیورٹی فراہم کی جائے،" یہ احکامات صوبے میں دہشت گردی کی نئی لہر کے پیش نظر جاری کیے گئے اور ریلوے پولیس نے بھی ریلوے اسٹیشنوں کے لیے سیکیورٹی ہائی الرٹ جاری کر دی ہے۔ پولیس کا کہنا ہے کہ کوئٹہ، سبی، مچھ اور چمن ریلوے اسٹیشنوں پر سیکیورٹی بڑھا دی گئی ہے۔