وزیراعلیٰ سندھ سید مراد علی شاہ نے صوبے بھر میں ہندو برادری کے لیے ہولی کے موقع پر دو چھٹیوں کا اعلان کیا ہے۔
سرکاری نوٹیفکیشن کے مطابق سندھ حکومت کے انتظامی کنٹرول میں آنے والے تمام خود مختار، نیم خود مختار اور سرکاری اداروں کے تمام ہندو ملازمین کو ہولی کے موقع پر 18 اور 19 مارچ کو چھٹیاں دی جائیں گی۔
اس حوالے سے بات کرتے ہوئے وزیراعلیٰ سندھ نے اس پرمسرت موقع پر ہندو برادری کے لیے نیک تمناؤں کا اظہار کیا اور پاکستان کی ترقی اور خوشحالی میں ان کی کوششوں اور قربانیوں کا اعتراف کیا۔
انہوں نے مزید کہا کہ سندھ پولیس کو ہولی کے موقع پر ہندو برادری اور ان کے مقدس مقامات کی فول پروف سیکیورٹی کو یقینی بنانے کے لیے سخت ہدایات دی گئی ہیں۔
وزیراعلیٰ نے مزید کہا کہ سندھ کی حکومت اور عوام ہمیشہ ہندو برادری کے ساتھ کھڑے رہے ہیں اور دونوں ان کے حقوق کے تحفظ کے لیے کوششیں جاری رکھیں گے۔
انہوں نے یہ بھی یاد دلایا کہ سندھ میں برسراقتدار حکمران جماعت نے ہندو برادری کو نہ صرف اسمبلی میں بلکہ صوبائی حکومت کے ہر خود مختار، نیم خودمختار اور سرکاری ادارے میں بھی نمائندگی دی۔